La vischnaunca Lumnezia enquera candidats e candidatas per il secund scrutini dallas elecziuns ella suprastonza communala per la perioda d'uffeci 2025-2028.
Candidaturas ni propostas d'elecziun per in’autoritad communala san vegnir inoltradas da mintga persuna cun dretg da votar en scret alla canzlia communala. Quellas han da cuntener il num exact dalla candidata ni dil candidat e sin tgei uffeci che la candidatura ni la proposta d'elecziun sereferescha.
Mintga persuna cun dretg da votar sa inoltrar mo ina ga ina proposta d'elecziun. Ina proposta d'elecziun astga cuntener sil pli bia tons nums da persunas elegiblas, sco quei ch'ei ha uffecis vacants. Per la perioda d'uffeci 2025 - 2028 ein quei quater sezs dalla suprastonza communala. Nums che survargan il diember maximal vegnan strihai dalla gliesta da sut ensi e da dretg a seniester. Per ch'ina proposta d'elecziun seigi valeivla, sto quella esser suttascreta dalla persuna che fa la proposta e dalla persuna che vegn proponida.
La vischnaunca publichescha candidaturas e propostas d'elecziun ch'ein valeivlas dafertontier sin sia pagina d'internet per informaziun. Sil pli tard ils 16 da december 2024 vegnan las candidaturas e las propostas d'elecziun publicadas els organs da publicaziun dalla vischnaunca. Candidaturas e propostas d'elecziun che vegnan inoltradas memia tard, vegnan buca publicadas.
Ils termins dalla procedura d'elecziun sebasan sillas directivas digl e-voting, ch'ein surordinadas e mettan duront il temps da pilot pigl e-voting ord vigur ils termins stipulai els artechels corrispundents dalla Constituziun dalla vischnaunca Lumnezia (011.100). Il proceder sco tal ei da suandar tenor ils artechels dalla constituziun communala.
04-11-2024 publicaziun dils sezs vacants per uffecis communals
09-12-2024 davos termin per inoltrar candidaturas per uffecis communals
13-12-2024 davos termin per eventuala retratga da candidaturas
L'elecziun ha liug ensemen cun la votaziun federala dils 09 da fevrer 2025.