Las elecziuns dallas autoritads communalas dalla vischnaunca Lumnezia per la perioda d'uffeci 2025 – 2028 han liug ils 22 da settember 2024 ensemen cun las votaziuns federalas e cantunalas.
La vischnaunca Lumnezia fa part dil project da pilot per il program da votaziun electronic, e-voting. Ils 22 da november 2023 ha il cussegl federal concediu al cantun Grischun la lubientscha da basa per quei project. Quella lubientscha vala tochen e cun las votaziuns dils 08 da mars 2026.
Pervia dil process da preparaziun per la votaziun cun e-voting ein ils termins vegni fixai sco suonda.
07-06-2024 davos termin per inoltrar en scret demissiuns d'autoritads communalas che stattan buca pli a disposiziun per in uffeci (bul postal ni datum digl e-mail)
14-06-2024 publicaziun dils sezs vacants per uffecis communals
22-07-2024 davos termin per inoltrar candidaturas per uffecis communals
26-07-2024 davos termin per eventuala retratga da candidaturas
Quels termins cheu publicai ein surordinai e mettan duront il temps da project ord vigur ils termins stipulai els artechels corrispundents dalla Constituziun dalla vischnaunca Lumnezia (011.100). Il proceder sco tal ei da suandar tenor ils art. 8 ss dalla constituziun communala.