La vischnaunca ademplescha las incumbensas che sepresentan ad ella en favur dil beinstar dalla communitad. Ella promova il svilup cultural ed economic, il beinstar social e general da ses habitonts sco era il manteniment persistent dallas basas da viver natiralas.
L’autoritad suprema en vischnaunca ei la cuminonza dallas persunas cun dretg da votar. Sco legislativa excercitescha ella ses dretgs all’urna ni alla radunonza communala. La suprastonza communala ei l’autoritad administrativa e poliziala dalla vischnaunca. L’executiva cun nov departaments secumpona dil president communal e dad otg ulteriurs commembers. L’organisaziun operativa cumpeglia l’administraziun generala cugl uffeci da baghegiar, il survetsch tecnic ed igl uffeci forestal.
Las autoritads ed ils emploiai capeschan lur incumbensas sco survetsch alla communitad. Finamira ei d’exequir las lavurs effectivamein ed a moda cunvegnenta per cuntentientscha dils vischins. Quei denton adina a moda raschuneivla cun respectar aspects economics ed ils mieds finanzials disponibels.
Informaziuns co arrivar
Cun auto
Sur l'autostrada A3 / A13 da Cuera sur Flem / Laax entochen Glion ni tras Panaduz sin la via veglia sur Versomi per liung dalla cavorgia dil Rein (Ruinaulta) e silsuenter en direcziun Lumnezia (Vella - Vrin).
Naven dalla Svizra centrala ed il Valleis dad Andermatt sur igl Alpsu (Cuolm d'Ursera) tras Disentis/Mustér tochen Glion, silsuenter en direcziun Lumnezia (Vella - Vrin). Naven da Nadal entochen Pastgas circulescha in tren da transportar autos Andermatt - Sedrun - Andermatt. Il viadi sur il pass digl Alpsu (2'033 m s. m.) cuoza rodund 60 minutas.
Naven dil Tessin sur il Cuolm Lucmagn (1'972 m s. m.) tras la Val Medel, Disentis/Mustér tochen Glion e silsuenter en direcziun Lumnezia (Vella - Vrin).
Cun mieds da transport public
Naven da Cuera entochen Glion cun la Viafier Retica.
Ulteriuras informaziuns www.rhb.ch
Naven dalla Svizra centrala da Göschenen dad Andermatt sur igl Alpsu entochen Disentis/Mustér cun la Viafier Matterhorn Gotthard e vinavon cun la Viafier Retica entochen Glion.
Ulteriuras informaziuns www.mgbahn.ch
Naven da Glion circuleschan autos da posta regularmein ella Lumnezia (Vella - Vrin).
Ulteriuras informaziuns www.postauto.ch