Uffeci da taglia

Mintgamai la fin schaner vegnan tarmess ils quens provisoris da taglia per igl onn vargau. Suenter che la taxaziun da taglia ei succedida, vegn tschentau il quen definitiv da taglia. La facturaziun dils quens da taglia sin entrada e facultad succeda entras l'administraziun da taglia cantunala. Igl uffeci da taglia communal ei responsabels per igl incasso e per las admoniziuns (incl. stumaziuns).

Per l'inoltraziun dalla declaronza da taglia valan ils suandonts datums:

• 31 da mars per persunas cun activitad da gudogn dependenta, scolars e students maiorens, pensiunai, disoccupai e cuminonzas d'artavels
• 30 da settember per persunas cun activitad da gudogn independenta, societads semplas, purs e persunas che habiteschan ordeifer il cantun Grischun cun ina filiala el cantun Grischun
• 30 da settember per persunas domiciliadas ordeifer il cantun Grischun cun immobilias el cantun Grischun

Sche las taglias communalas san buca vegnir pagadas enteifer il termin legal, dat ei en cass excepziunals la pusseivladad da pagar la summa aviarta en ratas. Las ratas concedidas ston vegnir pagadas meinsilmein. Vegnan las ratas buca pagadas enteifer il termin, scada l'entira summa. Il tscheins da retard tenor lescha vegn tschentaus a quen separadamein suenter il pagament dalla davosa rata. La damonda per pagament en ratas dallas taglias communalas sto vegnir concedida digl uffeci da taglia Lumnezia. Ina damonda en connex cun il pagament en ratas dalla taglia cantunala e federala sto vegnir inoltrada tier l'Administraziun da taglia dil cantun Grischun.

Damonda per il pagament en ratas dalla taglia communala

Damonda per il pagament en ratas dalla taglia cantunala ni federala

Taglia sin entrada e facultad

Naven digl 1. da schaner 2023 munta il pei da taglia dalla vischnaunca Lumnezia a 90 % dalla taglia cantunala sempla.

Taglia alla baselgia

La taglia alla baselgia catolica importa 15 %.
La taglia alla baselgia evangelica importa 17 % (+ 3.5 % alla baselgia cantunala).
Quella taglia vegn calculada sin fundament digl import dalla taglia cantunala.

Igl object dalla taglia sin ierta ei il transferiment d'ina facultad als artavels legals ed als artavels incaricai sco era als legataris. Tier l'incasso dalla taglia sin ierta sils beins movibels ha per regla il qual cantun il dretg da pretender la taglia, en quel ch'il relaschader ha giu siu davos domicil. Per terren che vegn schaus en ierta, ei da pagar taglia en quei cantun, en qual ch'el schai.

La taglia sin donaziun sto vegnir pagada dil retschevider dalla donaziun. Sco basa da calculaziun vala la valur dalla facultad transferida. Il dretg sin la taglia dils beins movibels ha il cantun, en qual in schenghegiader haveva quei mument siu liug da domicil. Tier terren schenghegiau schai il dretg d'incassar la taglia tier il cantun, en qual il terren sesanfla. La taglia vegn incassada dalla vischnaunca sco era dil cantun. La taxaziun e la retratga succeda entras il cantun.

Liberai ein:

• il conjugal survivent
• las partenarias registradas ed ils partenaris registrai
• ils descendents, ils affons figliasters ed ils affons confidads sco era lur descendents
• las persunas ch'ein liberadas dalla taglia sin midada da proprietad tenor il dretg cantunal
• ils partenaris da concubinat
• ils geniturs

La taglia importa:

•  5 % per il tschep dils geniturs
• 15 % per las ulteriuras persunas benefiziadas

La taglia sil gudogn vegn pretendida tier la vendita da beins immobigliars. Sco gudogn dalla vendita vala la differenza denter il recav cuntenschiu ed ils agens cuosts per l'immobiglia. La taglia vegn incassada dalla vischnaunca sco era dil cantun. La taglia dalla vischnaunca importa 100 % dalla taglia cantunala. Taxaziun ed incasso succedan entras l'administraziun cantunala da taglia.

Sco midada da proprietad vala mintga transiziun da dretg da disposiziun effectiv ed economic d'in terren. Object dalla midada da maun ei pia la transiziun da proprietad sco tala. La taglia vegn quintada sil prezi da cumpra resp. silla valur commerciala e munta a 2 % da quei.

La vischnaunca incassescha ina taglia sin beins immobigliars tier terren che schai en vischnaunca. La taglia importa 1.5 ‰ dalla valeta da taglia alla fin digl onn calendari.

Il cantun incassescha ina taglia alla fontauna sil gudogn dalla lavur da burgheis jasters che possedan negina permissiun da domicil ni execueschan lur activitad professiunala mo ad interim en Svizra. Ils/las patruns/patrunas da lavur ein obligai da trer giu la taglia dalla paga e da extrader agl uffeci da taglia.

La taglia da tgauns per igl emprem tgaun munta a CHF 50.00. Per mintga ulteriur tgaun el medem tenercasa munta la taglia a CHF 100.00.

Deliberai dalla taglia da tgauns ein:

• Tgauns da polizia
• Tgauns da lavinas
• Tgauns per persunas senza udida
• Tgauns da saung

Tenor lescha dalla vischnaunca Lumnezia ein tut ils possessurs obligai d'annunziar lur tgauns. Dapli informaziuns tier l'annunzia dil tgaun anfleis Vus cheu.